Qaynarinfo xəbər verir ki, "Associated Press" agentliyinin dərc etdiyi təhlil məqaləsinə əsasən, Çin tədqiqatçıları "Starlink" peyklərinə qarşı mübarizə üçün qeyri-adi üsullar təklif edirlər. Bunlara radarlarda görünməyən sualtı qayıqlardan lazerlərlə hücum, ion mühərriklərlə təchiz edilmiş zərbə peyklərinin hazırlanması kimi ideyalar daxildir.

Çin hakimiyyəti "Starlink"in hərbi məqsədlər və mümkün casusluq fəaliyyəti üçün istifadə edilə biləcəyindən ciddi şəkildə narahatdır. Bu narahatlıqlar xüsusilə Rusiyanın Ukraynaya qarşı genişmiqyaslı işğalından sonra daha da artıb. AP yazır ki, Ukrayna döyüş meydanında əlaqəni təmin etmək, zərbə və kəşfiyyat PUA-larını idarə etmək üçün "Starlink"dən istifadə edərək ciddi üstünlük əldə edib.

Bununla belə, bu sistemin idarəsi yalnız İlon Maska məxsusdur. AP qeyd edir ki, Mask əvvəllər mühüm xidmətlərin göstərilməsini dayandırıb və işğal olunmuş Krımda Ukraynanın əks-hücum əməliyyatlarına dəstək vermək üçün "Starlink"in əhatə dairəsini genişləndirməkdən imtina edib.

AP-ın araşdırdığı 64 elmi məqalədən aydın olur ki, Çin alimləri Maskın peyklərinin izlənməsi və zərərsizləşdirilməsi üçün yollar üzərində işləyirlər. Məqalələrdə "Starlink"in ABŞ kəşfiyyat strukturları və Pentaqonla əlaqələri səbəbindən Çin hökumətinin və onun strateji maraqları üçün ciddi təhdid yaratdığı vurğulanır. Tədqiqatçılar şəbəkənin imkanlarını və zəif nöqtələrini hərtərəfli təhlil ediblər.

2023-cü ildə Çin Milli Müdafiə Texnologiyaları Universitetinin professorları yazırdı: "Birləşmiş Ştatlar "Starlink" texnologiyasını hərbi kosmik resurslara inteqrasiya etməklə strateji üstünlük əldə etməyə çalışdıqca, digər ölkələr bu sistemi nüvə, kosmos və kiberməkanda təhlükə kimi qəbul edirlər".

Çinli tədqiqatçılar "Starlink"in Pekin, Tayvan və qütb regionları da daxil olmaqla əsas coğrafi nöqtələrdə tam əhatə təmin edə biləcəyini müəyyən ediblər.

Çin hökumətinin dəstəklədiyi kibertəhlükəsizlik qrupunun yaydığı başqa bir məqalədə isə "Starlink"in təchizat zəncirinin zəiflikləri qeyd edilir. Şirkətin 140-dan çox birinci səviyyəli və yüzlərlə ikinci səviyyəli təchizatçısı var, amma kibermüşahidə imkanları məhdud olaraq qalır.

Xalq Azadlıq Ordusunun mühəndisləri isə 2023-cü ildəki bir araşdırmada "Starlink" peyklərini izləmək və siqnallarını tutmaq üçün ayrıca müşahidə peyk qruplarının yaradılmasını təklif ediblər. Həmçinin, günəş panellərinin fəaliyyətini pozmaq üçün peyk akkumulyatorlarına və ion mühərriklərinə aşındırıcı maddələrlə zərər vurmaq ideyası da irəli sürülüb.

Digər Çinli alimlər isə, paralel olaraq, diplomatik və hüquqi vasitələrdən istifadə edərək Maskı məhdudlaşdırmağın mümkünlüyünü də təklif edirlər. Bu çərçivədə kommersiya məqsədli kiçik optik teleskoplarla "Starlink" antenalarının monitorinqi, saxta təsvirlərlə yanlış hədəflər yaratmaq və hətta güclü lazerlərlə peykləri yandırmaq kimi təkliflər də yer alıb.

Aydın