Dəb dünyasını izləyən qadınlar artıq çoxdan müşahidə edirlər: mağaza vitrinlərində tez-tez tanış fasonlar görünür. Bəli, bu məhz 1970-ci illərin modasıdır. Kloş cinslər, iri eynəklər, saçaqlı elementlər, geniş biçimli geyimlər - 50 il əvvəl aktual olan bu detallar indi yenidən qarderoblara qayıdır. Bəs hansı geyimlər yenidən trendə çevrilib və onları necə kombinləmək olar?

1970-ci illərdə SSRİ və Qərbdə nə dəbdə idi

Qaynarinfo xəbər verir ki, 70-ci illərin dəbi haqqında danışarkən əsasən Qərb modası nəzərdə tutulur. Çünki o dövrdə SSRİ-də moda anlayışı daha çox nəzəri xarakter daşıyırdı. Fabriklər yalnız əlçatan və praktik parçalardan kütləvi istehsal üçün geyimlər tikirdi, krujeva, qeyri-adi düymələr və ya fərqli fasonlar qətiyyən qəbul olunmurdu. Dəbə uyğun geyinmək imkanı olan qadınlar isə adətən yüksək vəzifəli məmurların, diplomatların və ya hərbçilərin həyat yoldaşları idi.

Qərb modası bir qədər gec də olsa, Sovet İttifaqına da çatırdı, lakin müəyyən dəyişikliklərlə. 1970-ci illərin ABŞ modasında kloş cinslər və şalvarlar, qalın dabanlı və platformalı çəkmələr, "qolbağ" formalı sarafanlar və dar kombinezonlar trenddə idi. SSRİ-də isə tweed parçalardan ətək və jaket dəstləri, etnik naxışlı maxi donlar və A-kəsimli sarafanlar moda sayılırdı.

Total geyim qıtlığına baxmayaraq, gənclər dəbdən geri qalmamağa çalışırdılar. Onlar ya mövcud geyimləri özləri qərb üslubunda dəyişdirirdilər, ya da qeyri-rəsmi yolla "farstovşik"lərdən geyim alırdılar.

2025-ci ildə 70-ci illər stilində necə geyinmək olar? - Əsas trendlər

Bu gün dəbə uyğun geyinmək üçün bahalı mağazalara getmək artıq şərt deyil. Onlayn platformalar, ikinci əl mağazaları və ya sadəcə sandıqda unutduğunuz köhnə geyimlər belə işə yaraya bilər. Çünki 2025-ci ildə 70-ci illərin modası yenidən aktualdır.

Kloş şalvar və cinslər

Əgər bu fasonun sizi "hippi"yə çevirdiyini düşünürsünüzsə, yanılırsınız. Sadəcə bədən quruluşunuza və boyunuza uyğun modeli seçmək kifayətdir. Kloş cinsləri sadə köynəklər, bluzlar və ya qısa jaketlərlə kombinləyə bilərsiniz. Ayaqqabı olaraq isə yüksək dabanlı ayaqqabılar və ya rahat sandaletlər uyğundur. Bu kəsim silueti uzadır, beli vurğulayır və ayaqları daha incə göstərir.

Boho və digər oversize donlar

Əgər bir qədər sənətçi, bir qədər romantik və "kosmik" bir obraz yaratmaq istəyirsinizsə, boho stili sizə uyğundur. Təbii parçalardan tikilmiş boş donlar, etnik naxışlar, saçaq və sərbəst siluetlər – bunlar 70-ci illərin "azad ruhlu" insanlarını təmsil edən detallardır. Belə obrazları jilet və ya jaket, daşlı bijuteriya, yumşaq parçalardan böyük çantalar və alçaq dabanlı ayaqqabılarla tamamlamaq olar.

Parlaq printlər

Sarı zanbaqlar, bənövşəyi fonda ağ nərgizlər – 70-ci illərin dəbinin əsas atributlarıdır. Böyük naxışlardan, "turşu" rənglərdən qorxmayın. Sadəcə belə parlaq geyimləri sadə, birrəngli elementlərlə balanslaşdırmaq lazımdır. Məsələn, rəngarəng köynəyi mavi cinslə, ya da iri çiçəkli donu neytral rəngli çanta ilə kombin edin.

Məxmər və zamşa

Bu iki parça növü 70-ci illərin modasının ayrılmaz hissəsi idi və bu gün də yenidən dəbə qayıdır. Məxmər və zamşadan donlar, ətəklər, çantalar və gödəkçələr hazırlanır. Məsələn, ağ köynək və beldən yüksək oturan midi ölçülü məxmər ətək – sadə, lakin dəbli kombin ola bilər.

Əsas tövsiyə - ağıllı uyğunlaşdırma

Dəb dəyişir, zaman keçir, amma siz öz tərzinizi qoruyursunuz. Ən vacib olan, obrazı dəbli, zamana uyğun və eyni zamanda fərdi şəkildə təqdim edə bilməkdir. Köhnə ilə yenini birləşdirin, öz stilinizi yaradın və keçmişin modeli kimi deyil, bu günün şüurlu seçim sahibi kimi görünməyə çalışın.

Aydın